2008

Dagvaarding 2008

Op vriedag 3 oktober 2008 is in de sponsorruimte vaan 't Geusseltstadion, nao de wedstrijd vaan MVV, de dagvaarding veur de zitting vaan 2008 aofgelieverd en veurgeleze. Hijj oonder d'n teks, mèt de aonklaogpunte die groondslaag zien veur 't vuurwerk op de zitting vaan zoondag 30 november.

Vendaog, de vigilie vaan Wereldbiestendaag twiedoezend en ach, ten verzeuke vaan ’t Wiecker Tribbenaol, gevestig te Wyck / Mestreech, höb iech gerechsdeurwaarder Mr. Ramona Batta opgerope:

d’n hier Benoit Wesly

um:
op zoondag 30 november twiedoezend en ach, in de naomiddag um twie oor, in persoen te versjen ropeeechen zijne ter zitting vaan ’t Wiecker Tribbenaol, rechsprekend en daan aldaor te hawwe in ‘t Gerechtsgebouw vaan ’t Wiecker Tribbenaol aon de Green (wat ouch is de Maastricht Music Hall en wat waor de Platte Zaol),

mèt de aonzègking:
Gezeen zwoerwaogende arguminte, nao deepgaond oonderzeuk verkrege in ’t sirkwie vaan woerhede, haaf woerhede, roddel en achterklap, zuut ’t Wiecker Tribbenaol ziech verpliech um Benoit Wesly op te rope ter zitting,

teneinde:
Tot zien duipseel kin weure geliech en aon häöm de gelegenheid kin weure gegeve um in ’t openbaar te verklaore wie ’t zoewiet is kinne komme. umtrent de feite: tot ’n aonklach vaan leefs veer punte veurligk, te wete
1. ’t oonder valse veurwinsele zörge tot heer perseis krijg wat heer wèlt. In good Mestreechs hèt dat besodemietere, meh de hollandse wètgever heet daovaan gemaak ”oplichting” en dat weurt aongepak in ’t wètbook vaan strafrech oonder artikel 326.
2. ’t behep zien mèt ‘n wiedgaonde eigegereidheid, wat heet geleid tot allerlei op ziech strafbaar feite boe ’n seleksie oet gemaak is mote weure um de zitting einigszins binne de perke te hawwe. ’t Wètbook hoof mer willekeurig opgeslage te weure en ’t daan veurligkende artikel pas oongetwiefeld bij de gesignaleerde feite.
3. ’t beïnvloede vaan voetbalwedstrijde zoonder zelf in ’t veld te stoon. Heijveur is ’n artikel oet de Belzje wètgeving vaan stal gehaold, wat trowwens model heet gestande veur ’t Europees artikel 140, umtot men dao väöl mie ervaring mèt dit soort zake heet.
4. ’t handele mèt veurkinnes en in gebakke loch um zien ambisies woer te make. In de wèt op ’t finansjeel towziech weurt dit handele in artikel 5.56 aongepak en aofgesjote.

mitsdien
’t Hof vaan ’t Tribbenaol d’rop zal towzien tot de ketel flink gesjoord weurt en tot op ’n passende meneer rech getrokke weurt wat kroomp is gebleke, boebijj ’t Volk vaan Mestreech wel zal aongeve wat woer en neet woer liekent.

teves
höb iech, gerechsdeurwaarder, op d’n datum veurmeld, ten verzeuke vaan ’t Wiecker Tribbenaol, aon gedaagde aongezag:
a. tot verzèt tege deze oproop geine zin heet en zoonder nut is.
b. es de opgeropene dat toch meint te mote plege de rechterlikke mach häör tan zal laote zien;

De koste vaan dit exploit zien voor miech, gerechsdeurwaarder veurnump, ’t wèttelik vasgelag bedraag veur pro deo zake.

Is geteikend: Mr. Ramona Batta

Ouch vrund weure?

Sins 'n paar jaor heet ’t Wiecker Tribbenaol ‘ne groep vrun die ’t mèt meugelik make um zake die (väöl) sent koste toch te realisere. Veer hope ouch in volgende jaore ’n beroop op eus vrun te kinne doen. Wèlt geer ouch vrund weure, daan kin dat vaanaof ’n bedraag vaan € 20. Geer kint dat doen door ’t vrund-bedraag euver te make op rekening 94.65.62.091 t.n.v. Stg. Wieker Broonk. Gere eure naom en adres vermelde. Geer kint ouch kontak mèt us opnumme mèt behölp vaan 't contacformeleer of door 'ne email te sjikke aon sponsors@utwt.nl. Geef ouch dao eure naom en adres op. Es tegeprestasie rizzervere veer veur uuch 2 plaotse bij de volgende zitting.